އުމްރާއަށް ދިޔަ ދިވެއްސަކު މައްކާގައި ނިޔާވެއްްޖެ

އުމްރާގެ އަޅުކަމަށް، މައްކާއަށް ގޮސް ހުއްޓައި ދިވެހި އުމްރާވެރިއަކު ނިޔާވެއްޖެއެވެ.

ނިޔާވެފައިވަނީ އަމިއްލަ އުމްރާ ގްރޫޕެއްކަމަށްވާ މީގާތު ހައްޖު އެންޑް އުމްރާ ގްރޫޕުގެ ފަރާތުން ދިޔަ 68 އަހަރުގެ، ހދ. ހަނިމާދޫ، އަލަމާގެ، ޚާލިދު އިބްރާހިމެވެ.

އެ އުމްރާ ގްރޫޕުން ބުނި ގޮތުގައި އޭނާ ނިޔާވީ ރޭ ދަންވަރުގެ ވަގުތެއްގައެވެ. އޭނާގެ މައްޗަށް ކަށުނަމާދު ކުރުން އޮންނާނީ މިއަދު އަސްރު ނަމާދަށްފަހު މަސްޖިދުލް ހަރާމުގައި ކަމަށް ވެސް އެ ގްރޫޕުން ބުނެއެވެ.

މި ފަދަ ބައެއް ހާދިސާތައް މީގެ ކުރިން ވެސް ހިނގައިފައި އެބަހުއްޓެވެ.

އެގޮތުން ހައްޖަށް ދާ އުމުރުން ދުވަސްވީ ބައެއް ދިވެހީންގެ ހާލު ދެރަވެ ހޮސްޕިިޓަލުގައި ފަރުވާން ދޭން ޖެހުމާއި، ގެއްލުމާއި، ނިޔާވުންފަދަ ހާދިސާތައް މީގެ ކުރިން މެދުވެރިވެފައިވެއެވެ.

މި ދުވަސްވަރަކީ ސްކޫލު ޓާމް ބަންދު ދުވަސްވަރު ކަމުން ގިނަ ބަޔަކު އުމްރާގެ އަޅުކަމަށް ވެސް އަންނަނީ ސައުދީއަށް ފުރަމުންނެވެ.